سلامتك يا بلدي

سلامتك يا بلدي

ــــــــــــــــــــــــــــــــ

ــــــــــــــــــــــــــــــــ

سلامتك يا بلدى من غدر المجرمين و قولة الآه ...

ما عاش ولايستجري من كان الشر جواه ..

ما عاش اللي طعنك فى ظهرك بالحرق والنهب والتخريب ...

مين اللي يحرق أمه اللي راضع منها الحب والطيب .. ؟!

مين اللي يسلب وطنه في زماننا العصيب .. ؟ !

وفى يوم العاصف والجرح نازف ما يطيب ..

يدور يضرب رصاص ويولعها نار ورعب وتكسير ؟!

ما يعملها غير واحد ملوش أصل ولا أب رباه ..

مجرم إرهابي فى القانون وفى شرع الله ...

وفين هتروح يا للي مليت الجيب والخزاين بمال الفقير والغير ... ؟!

ماهو شايفك رب المداين والحساب عسير ...

يوم ما توقف أمام المولى القدير ..

ومصر هتاحكمك ياللي نمت فى قصور من فلوسها وسيبتها على الحصير .... !

***

شيرين شوقى

30/1/2011

قوم يا مصري

****

تحية لأبطال ثورة الحرية

إذا أراد الشعب يوما الحياة إستجاب له القدر

تحية من كل القلب لأبطال وشباب مصر

يوم الغضب ليس إحتجاجاً إنما ثورة شعب

وحدتنا هى سر نصرتنا

عاشت مصر حرة كريمة قوية عظيمة شريفة

****

قوم يا مصري

قوم يا مصري إرفع صوتك ..

دا صوتك أقوى من الرصاص
قوم يا مصري إغلب خوفك ..
قوم وخلي الدنيا تشوفك
قول للظلم لا .. للفساد لا .. للفتنة لا ..

بكره هتتغير ظروفك ..

مش هنسكت خلاص
أنت إبن النيل هلالك بيصرخ ويا صليبك ..
قوم فكر وأنت هتقدر ومصيرك بيديك
لا طوارئ ولا أمن دولة ولا رعب من البشوات

ليه ترضى على نفسك تشحت حقك

وتتمنى الحرامي يديك .. !

ولا مليون تهديد وسجن و ترباس ..
عيش يا مصري وانت مرفوع الراس ..

قوم يا مصري عدي وإرمي

فى صرح الحرية أساس ..
عاشت بلدنا لينا .. كرامتنا لينا .. ثروتنا لينا ..

ولا يمكن تانى هتنداس .....

***

المحامى
شيرين شوقى
28/1/2011

بحبك يا مصر

بحبك يا مصر

ــــــــــــــــــــــــــــــــ

ــــــــــــــــــــــــــــــــ

بحبك يا مصر ...
بحبك وكل ما دا حبك فى قلبي بيكبر
يا علامة فى قلب الزمن راشقة زي الصخر
بلادي ولا فيش زيك فى كل عصر
أمى أنتي وماليش غيرك يا محروسة مرسى وبر

***
بحبك يا مصر ..
لا تعصب ولا ظلم ولا الفساد على مجدك هيعفَر

عظيمة هتفضلي أم الدنيا رغم كل قهر
نيلك بيحكي كل لحظة لكل البشر
قصة كفاح قصة صمود وعزة ونصر

***
بحبك يا مصر ..
أحبك ترنيمة بكنيسة وآذان على الأزهر
أحبك فى المغربية على شط البحر
فنار إسكندرية ودلتا وسد عالى وسينا لينا فخر
ترابك يا غالية دفترومحضر وتبر

***
بحبك يا مصر ..
يا كهرمانة بقلب الجبل وتاريخ معطر
زرعة وبستان وغصن لبان محمية دايماً من كل شر
درعك حصين ورايتك فوق كل فكر
واديكي رغم الإرهاب رغم الدم هيفضل لكل حر

***
بحبك يا مصر ....
عمره ما كان مصري ولا أبداً هيكون ولا يقدر

اللي بيزرع فرقة ويسفك دم مصري بكل غدر

أنا مصري من قبلي ومن بحري من ليلي هأمشي للفجر

رغم العنف رغم الأنف مصر هتفضل هى مصر ..

بحبك يا مصر ....

***

شيرين شوقى

25/1/2011

ثورة عند المساء

ثورة عند المساء

رسم المساء الدافئ كأحضانكِ خطاً ملتهباً ..

أخرجني من جمود الجليد والجدران

إلى فضاءات عينيك المكتحلة بفيض الحنان

طار الفؤاد فى سماء العشق هائماً ..

***

أخرج إليكِ بين الزروع وسنابل الأفكار ملتهفاً ..

لأجدكِ منتظرة على جمر الهوى وشطوط الوديان

يسوقني القلب فى عجلة إلى حافة البركان

حياتي أنتِ وما أغلى الحياة على الإنسان

أغطس حتى القاع فى صدركِ سابحاً ..

***

طار الفؤاد كعصفور الدور حولكِ مرفرفاِ ..

يأمر عشقكِ الرابض داخلي يطلق العنان

يشدو فينظم من إسمكِ ترتيلة الوجدان

حبكِ نبض يشتعل يصل بالجليد حد الغليان

وتظل الروح فى نشوتها والقلب محلقاً ..

***

فى حبك أشتعل بالتمرد معلناً ...

لكل الشعوب أني أهواكِ حد الجنان

أجري فى الشوارع والميادين بالقارات والبلدان

أمزق الدساتير والأعراف وأحرق الأحزان

أحملكِ على كتفي وأرحل فيكِ مؤبداً ..

***

مسكينة من يدفعها الوهم كي تعتلي عندي منزلة ..

تدنو تتوسل في يأس زاحفة للأحضان

تحتال في خبث لتظفر بنظرة وإمتنان

يظل القلب عليكِ مغلقاً يحرسكِ بألف فارس وحصان

نعم أنتِ ثورتي التى لاتهدأ مطلقاً ..

***

وتعود عرائس المساء لتستقر على كفيكِ حالمةً ..

تنتظر إطلالة الفجر والورد والزهر والريحان

على محيا أميرة الإشراق ذات الخميل الباسم الفرحان

لتبيت في عيني تلتحف أجفاني حتى الصباح نائمةً ...

***

شيرين شوقي

14/1/2011

حبيبي أنت وما تدري

حبيبي أنت وما تدري

فينك غايب عنى ما تدق باب يا شمسي وقمري

من يوم مشيت قلبي داب وطال ليلي وسهري

يا نور الحشا وفرح الشباب يا بسمتى ونضري

كفاية دا بعدك عنى عذاب إشتقتلك يا عمري

واكتب لك يا أغلى الأحباب يا دنيتي وقدري

واستنى ما ترد جواب حاير تفوتني وتجري

شكيتك للنجمة والسحاب وكل همسة بتسري

غرضى إشتياق مش عتاب حبيبي أنت وما تدري

شيرين شوقى

10/1/2011

على مذبح الشهداء

على مذبح الشهداء

ــــــــــــــــــــــــــــــــــــــ

من وسط الضيق نرفع العيون فنراك ..

فى أتوننا المحترق فى جب الأسود معنا

بيعتك يا مخلص تحيا على يمناك ..

ليس لنا جيش ولا سلاح إنما

سيفنا كلمتك نعيش فى إسمك فى حماك ..

كثر الأعداء سيدى هاجوا حولنا

دماء الأبرياء بلا رحمة تتناثر رحماك ..

عروسك متألمة وأولادها فى ضنا

من أسيل الألام يتفجر نبع شفاك ..

فالأم الثكلى بأبنائها هى أمنا

علمتنا الحب مخلصي وليس سواك ..

درع مهوب إله محبوب أنت أمننا

نصرخ سيدي فى محنة الأشواك ..

نصرع سيدي بقنابل الغدر فى وطننا

أشلاء إبناؤك يا أبانا تترجاك ..

إطلع وأنظر من السماء كن بيننا

فها عروس ممزقة وشاب بلا حراك ..

أم تقتل وأطفال بلا ذنب زهقت أرواحها

ويتفاخر السفاحون أعداء الحياة بالهلاك ..

يا من حميت شعبك إغسل أحزاننا

فى حراب جنبك سيدي المصلوب خذنا هناك ..

يا من غلبت العالم إنقذنا ضمنا

يسوع ترس خلاصنا نتوق أن نرى يداك ..

على مذبح الشهداء نرفع قرباننا

دمعة القبطي على كتفك تنتظر يارب عزاك ..

****

شيرين شوقى

5/1/2011

دمك غالي ياشهيد

دمك غالي يا شهيد

ـــــــــــــــــــــــــــــــــــــــــ

مش راح نسكت تاني ..

دمك غالي علينا يا شهيد ..

***

شرف فوق صدورنا طوالي

نور سماوي طاهر ومجيد ..

***

ولاد الشهداء صوتهم عالي

وقت الجد رجال عزم حديد ..

***

صليبنا فوق رصاص الإرهابي

فوق كل شر وغدر ووعيد ..

***

نوعد كل شهيد بالغالي

مش راح نركع ونقول ونعيد ..

***

حقى هأخده منك يا أناني

أحرار احنا مش عبيد ..

***

هصلي وجرسي فى حضن قبابي

يرن ويهتف لكل قريب وبعيد ..

***

قبطي مصري جذروي واجدادي

ولا بنخاف من سيف تهديد ..

***

ديني مسيحي كنيستي داري

إنجيلي علمني الحب أكيد ..

***

وعمر الحب ما يخاف ويداري

أسود فى حقوقنا وبقلب عنيد ..

***

عمر الموت ما هيهزمنا يا جاني

كنيسة الشهداء فردوسها نشيد ..

***

إلهنا وعدنا حصنه باقى

مجده وسطنا وعهده جديد ..

***

مش راح نسكت تاني

دمك غالي علينا يا شهيد ..

***

المحامى / شيرين شوقى

3/1/2011