معقول دا قبر .. عند الفجر .. تشرق فيه شمس حياه
بعد الدفن تلاتة أيام .. !
***
معقول دا قبر .. !
مريمات وحنوط .. كفن محطوط .. تلميذ بيجري والتاني وراه
في معاد مظبوط .. إبليس مربوط .. حراس مرعوبة من برق ضياه
ملكنا وهبنا عهد سلام .. !
***
معقول دا قبر .. !
مكان للموت .. صبح ملكوت .. بركة ونعمة لكل الناس
علي الصوت .. بعد الصلبوت .. قيامة ونصرة دقوا الأجراس
نام الليل والنور دام .. !
***
معقول دا قبر .. !
يوم الأحد .. عنوان المجد .. فخر يهوذا .. عليه اتكتب
فاق الحد .. أخد ورد .. قبر الحي .. فضة ودهب
بهجة ورهبة .. ما فيش كلام .. !
***
معقول دا قبر .. !
رنة فرح .. الشر إنطرح .. بلابل سرور .. إلهنا غلب
زي ما شرح .. قبر إنفتح .. سلاسل نور .. واللي إتصلب
إللي فدانا حي وقام .. !
***
شيرين شوقي
ــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــــــــ
ليست هناك تعليقات:
إرسال تعليق