ملك اللي فداني
ملك اللي فداني
ــــــــــــــــــــــــــــــ
انا ملكه وحده عبده وابنه موش
لحد تاني
عمري وحبي وقلبي ملك شخصي
للفداني ..
كنت أعمى و تايه كنت في ضلمة
عالم تاني
دق بابي ليلة شتا سمعت صوته حبه
دفاني ..
غريبة يارب اقولك ايه انا كنت
بعيد وحداني
عايش يومي غرقان في نومي و أحلام
و أماني ..
وسط اصحابي والضحك عالي وتلاهي
وخداني
سهرة هنا حفلة هنا عايش لنفسي
مغرور وأناني ..
بضحك بره بس جوه ميت في كفن أحزاني
وأدور على شيء ضايع اتاري نفسي
نقاصناي ..
جوايا مقسوم نصين كل واحد خجلان من التاني
حرب ودايره بيني وبينها نفسي
كانت زمان عنواني ..
تاهت مني وسط الزحمة وسنين طويلة
مغرباني
لحد ما كانت ليلة بصيت لقيت
عينيه شايفاني ..
حضنه يا ناس كان مفتوح حبه يا
ناس نجاني
قلت يارب تجيني ازاي وانا عاصي و
خاطي وزاني ..
قلبي الحجر ينفع يدق وهتسمع تانى
وداني
دا انا في الشر عشت وطريق النعمة
رماني ..
كانت عينيه مليانه حنان ونظرة حب
أب حقاني
قالي انا جاي اتعشى معاك افتح
بابك تلقاني ..
دموعي انفجرت صرخَت يارب سامحني
انا جاني
قالي بدمي فديتك غطيتك سترتك
بجناحي بأماني ..
هشفيك وأرويك وأرجع روحك فيك
وتعيش علشاني
قلت ها اعيش وغيرك ماليش ملك
شخصي للفداني ..
****
شيرين
شوقي
20/7/2012
ليست هناك تعليقات:
إرسال تعليق